Սեպտեմբերի 22-ին ՀՀ ԱԺ ԵԼՔ խմբակցության պատգամավորներ Նիկոլ Փաշինյանը, Էդմոն Մարուքյանը, Արտակ Զեյնալյանը, Գևորգ Գորգիսյանը, Լենա Նազարյանը և Արարատ Միրզոյանը, ինչպես նաև Երևանի ավագանու ԵԼՔ խմբակցության ղեկավար Դավիթ Խաժակյանը, ավագանու անդամներ Արայիկ հարությունյանը, Անի Սամսոնյանը և Թեհմինե Վարդանյանը հանդիպել են օրերս Հայաստան-Սփյուռք համաժողովի շրջանականերում Հայաստան ժամանած Թուրքիայի խորհրդարանի հայ պատգամավոր Կարո Փայլանին։

ՀՀ ԱԺ պատգամավոր Էդմոն Մարուքյանը վերջինիս ներկայացրել է ԵԼՔ դաշինքի ստեղծման պատմությունը, անցած ուղին, գործունեության սկզբունքները և առաջիկա անելքիները։ Անդրադարձ է կատարվել դաշինքի նախընտրական ծրագրում նշված հայ-թուրքական հարաբերությունների առանց նախապայմանների կարգավորման դրույթին և այդ խնդրի հետ կապված մի շարք հարցերին։ Պատգամավոր Կարո Փայլանը դաշինքի ներկայացուցիչներին համառոտ ներկայացրել է ժամանակակից Թուրքիայի քաղաքական անբարենպաստ զարգացումները տարածաշրջանի համար, թուրք-քրդական հարաբերությունների սրման հնարավոր հետևանքները և ընդհանուր անելիքները ժողովրդավար Թուրքիայի և ժողովրդավար Հայաստանի տեսլականի մասին։

Հանդիպման ավարտին ԵԼՔ դաշինքի անդամները պատրաստակամություն են հայտնել շարունակել համագործակցությունը և կապ պահպանել Թուրքիայի հայ պատգամավորի հետ։